Seën

Dit gaan goed met elkeen wat die Here dien en Sy wil doen.  Kyk, so word die man geseën wat die Here dien.  Psalm 128:1,4

 

Baie mense is onbewus of onkundig oor die onmeetlike vrygewigheid van God.  Hulle eie behoefte of nypende armoede verblind hulle en vervreem hulle van die Een wat hulle lyding kan verlig en hulle armoede in weelde kan omskep.

Die skrif openbaar aan ons die verblydende feit dat God baie gewilliger is om te gee as wat ons is om te ontvang.  As ons net opreg en gelowig wil bid en glo, kan  ons dit ontvang waarvoor ons bid.

As jy aan jou Hemelse Vader 'n versoek rig, moenie saam met jou versoek die twyfel huisves dat Hy nie jou versoek kan toestaan nie.  So 'n gesindheid skep wantroue, en gebede word nie beantwoord voordat twyfel met geloof vervang word nie.  God hoor jou gebed en sal in elke behoefte voorsien uit die rykdom van Sy genade.

 

Here God, dankie dat U oor ons die wag hou.  Dankie dat U seën oor ons uit gestort word.  Help ons o Heer om nie te twyfel as ons na U toe kom met ons bekommernisse nie, dat ons dit in U hande los.  Dankie Heer vir U liefde onvoorwaardelik.  Amen